Masuuliyiinta dalkaasi Yemen ayaa todobaadkani gacanta kusoo dhigay nin muddo 3 bilood sidi waraabaha oo kale duurka ugu jiray isla markaana ka xadi jiray xoolaha iyagoo noolna kadib cuni jiray.

Masuulka amniga ee deegaanka Tiban oo taabacsan Gobolka Luxaj ee koofurta Yemen ayaa u sheegay wargeyska Ayaam ee kasoo baxa dalkaasi in ninka ay soo qabteen ay ka danbeysay qabashadiisa baadi goob ay u galeen ciidamada amaanka kadib markii dacwado ay soo gaareen.

Waxa uu ku waramay in markii ciidamada amaanka ay gacanta kusoo dhigeen eedeymaha ay markiiba weydiiyeen waxa ku qasbay arrinka uu ku dhaqaaqay ee ah in uu xoolaha iyaga nool cuno marka uu xado kadib,waxaana ninkaasi uu sheegay in uu heli waayay wax uu ku noolaado isla markaana uu maciin biday xoolahaasi.

Isagoo ka sheekeynayay sida uu Xoolaha u cunayay mudadii 3-da bilood ee uu duurka ku jiray ayuu sheegay in marka hore uu cunaha kaga dhigi jiray sida waraabayaasha isla markaana uu qaniiniyo kaga qaban jiray meelaha jilcan ee dhuunta isagoona dhuuqaya dhiigga illaa ay ka naf baxdo.

Waxaa uu markaasi kadib sameyn jiray in uu maqaarka gacmihiisa kaga bixiyo isla markaana hilibka oo ceyriin ah uu halkaasi ku cuno,sidaasi darteed ayuu isaguna ninkaasi yeeshay qaab bahal oo haddii la arko laga dareemayo sida ay sheegayaan masuuliyinta Yemen.

Dhacdadani yaabka leh oo ay warbaahinta Yemen tabineysay todobaadkani ayaa ka dhacday meel lama dagaan u dhaw oo lagu magacaabo Cathira,waxaana la sheegaa halkaasi in ay dagaan dad badow ah oo inta badan aad kaga fog nolosha magaalooyinka iyo dhaqanka dadka ilbaxa ah.

Markacadey.net

Fadla hadaad website-kaaga gelineysid kuqor Markacadey.net,
Joojiya xaditaanka