C/raxmaan Cabdi Shakuur Warsame oo ah wasiirka iskaashiga caalamiga ah iyo qorsheynta xukuumadda Somaliya waxa uu sheegay in uu la kulmay saraakiil ka tirsan wasaaradaha arimaha dibadda iyo horumarinta xukuumadda dalka Britan iyo jaaliyadda Soomaalida ee ku dhaqan magaalada London oo uu haatan socdaal ku joogo.

Wuxuu sidoo kale sheegay wasiirka in ay isla soo hadal qaadeen xaaladaha murugsan ee hadda ka jira Soomaaliya intaasina wuxuu ku daray in dhamaan dadka uu la kulmay ay si weyn u taageereen dowladda Soomaaliya isla markaana uu ka helay balan qaadyo ku aadan wax ka qabashada xaaladdaha ka cakiran wadanka Soomaaliya.

C/raxmaan Cabdi Shakuur oo mar wax laga weydiiiyay waxa uu kala socdo hubka ah saanad malateri ee Mareykanku u soo diray dowladda KMG Soomaaliya iyo waxyaabaha uu hubkasi ka kooban yahay ayaa asigoon beenin arintaas wax uu ku jawaabay in ay wax ka jiraan arintaas.

C/raxmaan Cabdi Shakuur wuxuu sheegay in hadafka dowladda Soomaaliya uu yahay dib u heshiisiin iyo in wada hadalo loogu yeero dhamaanba qeybaha Soomaaliyeed ee ay ka go’do talada dalka waxaase mar la weydiiyay haddii hadafka dowladda sidaasi yahay sababta ay u dalbaneyso taageero milateri oo caalami ah loo kala saarin ciidamada safka hore iyo weliba kuwa dambe ayuu sheegay in arintaasi ay timid ka dib markii mucaaradku ay diideen sida uu yiri dedaaladii nabadeed ee la waday dagaalna kala soo horjeesteen dowlada.