Wadada wareega iyo wadooyinka hareer mara magaalada Jowhar kadib markii kooxo burcad ah ay siyaabo kala duwan ugu dileen mudo todobo maalmood gudahood ah dad safar ahaa.

Darwaladaan ayaa ka codsaday maamulka Islaamiga ah ee magaalada Jowhar in ay wax ka qabtaan kooxahan burcada ah oo baabuurta rasaas ku istaajiya ka hor inta aysan dhicin,waxaa kale oo ay codsadeen in kooxahan burcada ah lasoo saaro maxkamad.

Ugu yaraan hal ruux ayaa geeriyooday 2 kalana dhaawacyo ayaa soo gaaray habeenkii Isniinyta kadib markii kooxo burcad ah oo hubeysan ay rasaas ku fureen gaari rakaab ah oo marayey wadada wareega ah ee marta duleedka galbeed ee magaalada Jowhar.

Qofka dhintay ayaa ahaa wiil dhalinyaro ahaa kaas oo ka mid ahaa rakaabkii saaraa gaariga halka labada ruux ee dhaawacantay mid ka mid ah ay dumar aheyd,iyadoona baabuurka oo ahaa kuwa rakaabka ah ay baarteen kooxdii burcada aheyd sida ay xaqiijiyeen qaar ka mid ah dadka saaraa baabuurka oo aan la kulanay.

Gaarigaan ayaa ka yimid magaalada Muqdisho isaga oo kusii jeeday gobollada dhexe ee dalka Somalia sida uu inoo sheegay darawalkii baabuurka oo aan ka wareesanay dhacdadaasi,isaga oo intaasi raaciyey in kooxda burcacda ah ee gaariga baaratay ay rasaas ku staajiyeen baabuurka ka hor inta aysan furan dhamaan dadki saaraa gaariga.

Goobta falka uu ka dhacay oo ah wadada wareega oo ah wado jid carri ah oo isku xirto magaalada Jowhar iyo gobollada dhexe iyo magaalada caasimada ah ee Muqdisho ayaa waxaa gaaray ciidamo ka tirsan kuwa maamulka Islaamiga ah ee magaalada Jowhar oo halkaasi ka sameeyey howlgallo inkastoo aanan wali laga helin faahfaahin ku aadan howlgalkaasi ay ku ugaarsanayaan kooxaha burcada ah.

Baryahan ayaa waxaa soo badanayey falalka burcadnimada ee baabuurta safarka ah loogu geeysanayo duleedyada magaalada Jowhar,dhamaadki asbuucii hore ayey aheyd marki kooxo burcad ah ay wadada ugaleen gaari hoomey ah oo ay la socdeen dad kasoo barakacay magaalada Muqdusho kaasoo burcadu ay ku dileen hal ruux halka ay ku dhaawaceen qof kale.

Maamulka Islaamiga ah ee magaalada Jowhar ayaa wada dadaal aan yareyn oo dhinaca amaanka ah iyadoona ciidamada ammaanka ay sameeyaan howlgallo amni sugid ah.