Munaasabada 1-da Luulyo oo xalay si aan ballaarneyn looga xusay Magaalada Muqdisho
Munaasabad lagu xusayay 1-da Luulyo oo ku beegan xornimo-qaadashadii Gobollada Koofureed ee Soomaaliya iyo Midowgii Gobollada Waqooyi iyo Koofur ayaa waxaa xalay laga xusay Magaalada Muqdisho, inkastoo maamuuska xalay loo sameeyay uu ahaa mid aan aad u ballaarneyn.
Wasiirro, Xildhibaano, Madaxda Maamulka Gobolka Banaadir iyo Saraakiil Ciidan oo ay wehlinayeen dadweyne aad badneyn oo kala yimid degmooyinka Xamar-weyne iyo Xamar Jajab ayaa xalay isugu tegay Xarunta Gobolka Banaadir, iyadoo halkaasina ay hadallo ka jeediyeen qaar ka mid ah mas’uuliyiintii Dowladda ee halkaas isugu tegay.
Xarunta Gobolka Banaadir ayaa waxay ahayd mid ammaankeeda si weyn loo adkeeyay, waxaana xaafadaha u dhow ay ahaayeen kuwo laga joojiyay dhaqdhaqaaqii dadka iyo gaadiidka.
Mas’uuliyiintii ka hadlay xuska loo sameynayay 1-da Luulyo waxaa ka mid ahaa Guddoomiyaha Gobolka Banaadir Maxamed Cusmaan Cali Dhagaxtuur, Wasiirradda Horumarinta Reer Miyiga Khadiijo Maxamed Diiriye, Taliyaha Ciidanka Booliska Soomaaliyeed Jen. Cabdi Xasan Cawaale Qeybdiid iyo Shiikh Yuusuf Maxamed Siyaad Indha Cadde oo uu Jen. Cabdi Qeybdiid ku dhawaaqay in uu yahay Wasiiru Dowlaha Wasaaradda Gaashaandhigga Xukuumadda Soomaaliya.
Waxay ku dheeraadeen mas’uuliyiintaas dhamaantood qiimaha ay leedahay maalinta 1-da Luulyo iyo halgankii loo soo maray xornimada Soomaaliya 49 sano ka hor. Laakin Taliyaha Ciidamada Booliska Soomaaliyeed Jen. Cabdi Xasan Cawaale Qeybdiid ayaa sheegay in ay ka xun yihiin in munaasabadda 1-da Luulyo loo xuso si aad u hooseysa.
Sidoo kalena Shiikh Yuusuf Maxamed Siyaad Indha Cadde ayaa isna ka hadlay munaasabadda, wuxuuna sheegay in ay wax lagu farxo tahay in la xuso maalintii ay sida buuxda u xoroobeen dadka Soomaaliyeed, wuxuuna sheegay in umad walba oo dunida ku nool ay leedahay maalmo ay weyneyso oo xusuus gaar ah u leh.
Ugu dambeyntiina, waxaa 12-kii habeennimo ee xalay la saaray Calanka Soomaaliya, iyadoo ay astaanta Muusikada Calanka Soomaaliyeed ay garacayeen Kooxda Baambeyda,waxayna xafladdaas ku soo gebagebowday si nabadgelyo ah.
|
No Comments have been Posted. - Wax Faalo ah ma Dirin.
|
|
Rating is available to Members only.
Please login or register to vote.
No Ratings have been Posted.
|
