Madaxweynaha dalka Jabuuti, Ismaaciil Cumar Geelle, waxa uu gelinkii dambe ee shalay khadka Telefoonka kula xiriiray Dhigiisa dalka Yeman, Cali Cabdalal Saalax, si uu uga tacsideeyo dadkii ku geeriyooday Diyaaraddii laga lahaa dalka Yeman ee shalay ku burburtay Jesiiradda Komooro.


Wakaalladda Wararka dalka Yeman ee SABA, ayaa sheegtay inuu Madaxweynaha dalka Jabuuti uu Tacsi Qaran u gudbiyey Madaxweyne Cali Cabdaalla Saalax, Dowladda iyo Shacbiga Yeman, gar ahaan Ehelladdii ay dadka kaga geeriyoodeen Shilkaasi Diyaaradeed, wuxuuna Rabbi uga baryey inuu u naxariisto Marxuumintii ku geeriyootay Shilka Diyaaradeed, isla markaana uu Ehelladooda Samir iyo Iimaan ka siiyo.


Dhinaca kale. Labada Madaxweyne waxay ka wada hadleen xiriirka labadooda dal iyo Xaalladihii ugu dambeeyey ee dalka Soomaaliya, waxayna isku aragti ka noqdeen qaabka loo wajahayo Xal-u-helidda arrimaha dalka Soomaaliya, gaar ahaan Codsigii DFKMGS ee ay dalalka deriska u gudbisay, si ay Taageero Milliterri ula garab istaagaan.