Wararka ka soo baxay dagaalka culus oo saaka dib uga qarxay woqooyiga magaalada Muqdisho ayaa sheegaya in dagaalka u dhaxeeya ciidmada dowlada oo garab ka helaya kuwa Amisom iyo kooxaha Mucaaradka uu sii lixaadsaday iyadoona degmooyinka woqooyi ee magaalada Muqdisho madaafiica lagu garaacayo.

Ciidamada Midoowka AFrika ee Dagalka saaka ka qeyb galay ayaa lagu waramayaa in ay madaafiic ku garaacayaan qaar ka mid ah degmooyinka Magaalada Muqdisho gaar ahaan kuwa dagaalada ay ka socdaan iyo kuwa kale.


Dhawaqa Madaafiicda ayaa laga maqlayaa dhamaan qeybaha kala duwan ee magaalada Muqdiho waxaana jira Madaafiic hawow ah oo ku dhaceeysa qeybaha kala duwan ee magaalada Muqdhso ee uu ka mid yahay Suuqa Bakaraha , iyadoona qaar ka mid wodooyinka Magaalada Muqdisho lagu arkayo qoysas naftooda kala soo baxsanaya degmooyin ay ka mid yihiin Karaan,Yaaqshiid, C/Casiis,Boondheere iyo Qeybo ka mid ah degmada Hilwaa ka dib markii ay sameeyen madaafiicda iyo dagaalada haatan socda.

Ciidamada Midoowka Afrika ee dagaalka haatan socda qeyb ka ah ayaa la sheegayaa in ay damacsan yihiin fariisimo cusub in ay ka dameeystaan woqooyiga magaalada Muqdisho ka dib markii shalay iyo saaka labo jeer xoogaga mucaaradka ay soo jabsadeen dhufeysyo ay ku jireen ciidamada Dowlada.


Lama sadaalin karo natiijada dagaalka hasa ahatee waxa hubaal ah in dagaalkan haatan socdaa sababayo qasaaro badan oo kala gaara dhinacyada dagaalamay marka loo fiiro hubka aagaga dagaalka ka dhacaya.

Waxii soo kordha kala soco wararkeena danbe.