Madaxweynaha Soomaaliya Shariif Sheekh Axmed iyo wafdiga uu hogaaminayo ayaa xalay kulan balaaran la yeeshay Jaaliyadda Soomaaliyeed ee ku nool magaalada Birmingham ee dalkaasi Britain.

Madaxweyne Shariif iyo wafdigiisa ayaa kulamo gooni gooni ah la qatay Culumada Soomaaliyeed, Ardayda, Dhaqanka iyo waalidiinta ku nool magaaladaasi, waxayna ka wada hadleen arrimo badan oo ay ka mid tahay xaaladda dalka iyo dowrka ay ku leeyihiin Jaaliyaduhu xallinta mashaakilka ka taagan waddanka, ayagoo si weyn kulankaas ugu taageeray hannaanka nabadda ee Dowladdu ay hoggaanka u hayso.

Wasiirka jaaliyadaha ee dowladda Soomaaliya C/laahi Axmed C/lle Azhari oo ka war bixiyay kulankaas, ayaa sheegay in bulshadu ay qeyb qeyb ula kulmeen wafdiga madaxweynaha, ayagoo u bandhigay madaxweynaha caqabadaha ku haysta qurbaha iyo talooyin kale oo ku wajahan dalka Soomaaliya.

Kulamadaasi ka dib madaxweynaha jamhuuriyadda Soomaaliya Sh. Shariif Sh Axmed ayaa khudbad qiimo badan u jeediyay kumanaan ka tirsan Jaaliyadda Soomaaliyeed ee ku nool magaalada Birmingham, taas oo uu uga hadlay arrimo badan oo ku saabsan xaaladda dalku ku jiro, iyo wax yaabaha la gudboon Dowladda iyo soomaalida si looga baxo dhibaatada ka jirta dalkeena.

Madaxweynaha ayaa ku dheeraaday arrinta ku saabsan u midoobidda xallinta khilaafka ka taagan Soomaaliya iyo guulaha ugubka ah ee dowladda Soomaaliya ay u soo hoysay dalka Soomaaliya, wuxuuna tilmaamay in dowladddu muddadii ay jirtay ay la kulantay caqabado fara badan, haddana ay qabatay howl adag marka la fiiriyo guulaha ay ka soo heysay siyaasadda caalamka iyo tallaabooyinka dib-u-hishiisiinta ku salaysan ee ay dalka ka hergilisay, walina ay waddo.

Madaxweyne Shariif waxaa kale oo uu khudbadiisa uga hadlay xaaladda ammaanka ee dalka, isagoo tilmaamay in la joogo waqtigii ay Soomaalidu ka nasan lahayd kooxaha magaca diimeed ku baneysatay dhiigooda, dowladduna ay qorshe cad ka qaadan doonto arrintaas dhawaan, wuxuu sheegay in hadafka koowaad ee dowladda uu yahay in maleeshiyaadka ajaanibta iyo sokeeyaha isugu jira ee dalka dhibaatda ka wada, si dalku uusan u noqon mid fashilmay am ahoy u noqda argagixiso.

Wuxuu rajo wanaagsan ka muujiyay madaxweynuhu sugida ammaanka dalka, isagoo sheegay in Dowladdu ay diyaarisay ciidamo ku filan soo celinta nabadda dalka.

Madaxweynaha ayaa ugu dambeyn shacabka Soomaaliyeed iyo jaaliyadaha dibadda ku dhaqan ugu baaqay in ay dowrkooda ka qaataan gulufka loogu jiro dowladnimada iyo la dagaalanka kooxaha cadowga u soo kiraystay burburinta dalka Soomaaliya.